PROGRAMA FALAMOS
Sobre esti proyectu
Falamos ye un programa d'enseñanza non reglada de les llingües asturiana y eonaviega pa persones adultes.
Esta iniciativa desendólcase con una programación de cursos en modalidá mesta de 42 hores de duración (22 en llinia y 20 presenciales estremaes en cinco sesiones n'horariu de tarde) asina como con cursos en llinia dafechu.
Les acciones formatives tienen como finalidá que l'alumnáu seya a desenvolvese nestes llingües en situaciones cotidianes con estructures cencielles, tanto de forma oral como escrita.
Subvencionáu pola Viceconseyería de Cultura, Política Llingüística y Deporte y xestionáu pola Federación Asturiana de Conceyos, Falamos tien una dimensión autonómica, centrándose'l gallego-asturianu o eonaviegu na fastera occidental y l'asturianu nel restu de la xeografía d'Asturies. La programación de les sesiones presenciales establezse intentando averar les sos sedes llocal y/o comarcalmente a les persones interesaes.
Con una estructura cenciella y dinámica, los temarios en llinia y presenciales inclúin aspectos venceyaos al vocabulariu y la gramática de dambes llingües: ámbitu personal y corporal, emocional y familiar; casa, pueblu y ciudá; comerciu y alimentación; trabayu y tiempu llibre. Inclúin tamién recursos llingüísticos sobre espacios naturales, viaxes, multiculturalidá, internet y medios de comunicación.
Más información / Máis información
